Арт-объект 2 августа билдәләнгән Һауа-десант ғәскәрҙәре көнө уңайынан барлыҡҡа килде. Рәсәй Геройы, генерал-полковник Владимир Шаманов белдереүенсә, десантсылар – ҙур һәм татыу ғаилә булып берләшә белә һәм мөһим бурыстарҙы үтәй.
Һәйкәлде асыу тантанаһында легендар конструктор Михаил Калашниковтың ҡатыны Фәйрүзә Бурганова ҡатнашты. Уның әйтеүенсә, һәйкәл тыныслыҡ һәм именлеккә саҡырыусы символ булып тора.
“Десантсылар һәр ваҡыт алғы һыҙыҡта. Улар алдында ҡыйыулыҡ, етеҙлек талап ителгән иң ҡатмарлы бурыстар ҡуйыла”, - тине Башҡортостан Башлығы хакимиәте етәксеһе Александр Сидякин.
Монумент десантсыларҙың дүрт образын сағылдыра. Уның төп һыны – бәләкәй Малай. Ул ата-бабалар антына тоғро ҡаласаҡ йәш быуын вәкиле. Һәйкәлде шулай уҡ Һауа-десант ғәскәре эмблемаһы төшөрөлгән байраҡ та тулыландыра. Проект авторы – Рифат Хужағәлиев. Бөгөн шулай уҡ ваҡыт капсулаһы һалынды. “Был Ватан һаҡсыларының батырлыҡ һәм ҡыйыулығына ихтирам символы. Төрлө быуын хәрбиҙәре – һәм Һин, Тыуған илдең буласаҡ һаҡсыһы, бронзала һынлындырылғанһың. Беҙ һинең баласағыңды һаҡланыҡ. Һин дә балаларыңды яҡларһың”, тигән һүҙҙәр яҙылған уның эсенә һалынған мөрәжәғәттә. Капсуланы 2055 йылда асыу планлаштырыла.
