Республикала коронавирус йоҡторған ауыр сирлеләр һәм вафат булыусылар һаны арта. Һаулыҡ һаҡлау министрлығынан хәбәр итеүҙәренсә, бер тәүлек эсендә 14 кешенең ғүмере өҙөлгән. Пандемия башланғандан алып, 1 мең 43 кеше үлгән. Үткән тәүлектә 302 кешелә “ковид-19” инфекцияһы раҫланған. Республика дауаханаларында 703 пациент дауалана. Уларҙың күбеһе өлкән йәштәгеләр. Табиптар 57 кешенең хәле ауыр булыуы хаҡында белдерә, бер кеше үпкәне яһалма елләтеү аппаратына тоташтырылған. Уҙған тәүлектә вакцина алыусылар исемлегенә 19 мең 535 кеше өҫтәлгән. Башҡортостанда коронавирусҡа ҡаршы вакцинаның беренсе компоненты 1 миллион 127 меңгә яҡын кешегә яһалған. 951 меңгә яҡын кеше прививка алыуҙы тамамлаған.
