Алға, чемпиондар! Радий Хәбиров бөгөн “Йәш һөнәрмәндәр” – Worldskills Russia милли чемпионатының финалын еңеүселәре менән осрашты. Ярыш августа Өфөлә уҙҙы. Башҡортостан егеттәре һәм ҡыҙҙары 8 алтын, 12 көмөш, 19 бронза миҙал яуланы. Республика Башлығы чемпионат еңеүселәре һәм призерҙарына рәхмәт белдерҙе һәм эшсе һөнәрҙәрҙе үҫтереү буйынса айырым программа булдырыуы хаҡында әйтте.
Радий Хәбиров шулай уҡ һәр еңеүсегә эшкә урынлашҡанда үҙ исеменән тәҡдим хаты яҙырға йәки эш биреүселәр менән шәхсән һөйләшергә вәғәҙәләне.
“Йәш һөнәрмәндәр” – Worldskills Russia милли чемпионатының финалы еңеүселәренә 100 мең һум, ә призерҙарға 50 мең һум түләнде. Өфө медицина колледжынан Нургизәр Ҡулдыбаев стоматология йүнәлешендә беренсе урын алған.
“Йәш һөнәрмәндәр” – Worldskills Russia милли чемпионатының финалында 76 төбәктән 1 мең 800-ҙән ашыу конкурсант ҡатнашты. Дөйөм миҙалдар һаны буйынса Башҡортостан командаһы икенсе урын алды.
