Ғүмерҙәрҙе һаҡлап. Башҡортостан аша үткән федераль трассаларҙа фото-видео теркәү буйынса өҫтәмә йөҙ комплекс ҡуйылды. Техник ҡоролмаларҙың өстән бер өлөшө альтернатив энергия сығанаҡтары ярҙамында эшләй.
Йыл аҙағына тиклем төбәк юлдарында тағы ла 800 яңы камера ҡуйыу ҡаралған, хәүефһеҙлек сараларын көсәйтеүгә йүнәлтелгән саралар менән БЮТ каналы хәбәрсеһе Гөлназ Хәйбуллина таныштыра.
Өфө-Ырымбур трассаһында тәртип булдырыу өсөн ҡырҡҡа яҡын өҫтәмә камера ҡуйылды. Уларҙың береһе 28-се саҡрымда, Булгаков ауылын үткәс тә юғары тиҙлек йыйған автомобилдәрҙе теркәй. Альтернатив энергия сығанаҡтары ярҙамында эшләгән комплекс республика кимәлендәге автомобиль юлынан күсерелгән. Тәү маҡсат - быға тиклем авариялар күпләп күҙәтелгән хәүефле участкала контролде көсәйтеү.
Башҡортостан башлығы Радий Хәбиров ҡушыуы буйынса быйыл марттан республика кимәлендәге автомобиль юлдарынан федераль трассаларға йөҙ аппарат-программа комплексы күсерелде. Айырыуса иғтибар «Урал» М-5-кә ҡараған хәүефле участкаларға йүнәлтелде. Билдәле булыуынса, йыл башынан ғына был трассала теркәлгән юл фажиғәләрендә 42 кешенең ғүмере өҙөлгән.
Ғинуарҙан алып ҡына Башҡортостанда ике миллион ярымдан ашыу «Бәхет хат»ы баҫтырылған. 2020 йылдағы осорға ҡарағанда, был күрһәткес 280 меңгә юғары. Тиҙҙән фото-видео теркәү комплекстары ярҙамында хоҡуҡ боҙоусыларҙы асыҡлау мөмкинлектәре тағы ла арта. Төбәктең транспорт дирекцияһы яңы проекттар өҫтөндә эш алып бара. Алдағы айҙарҙа республика юлдарында тағы ла 800 камера ҡуйыу планлаштырыла.
Юғары тиҙлек менән йөрөүселәр юлда иң ҙур хәүеф тыуҙыра. Ҡаршы һыҙатҡа сығып, газ педаленә баҫыу тотош ғаиләләрҙе юҡ иткән осраҡтар ҙа теркәлә. Өҫтәмә комплекстар ҡуйылыуы оло фажиғәләрҙән аралар тигән ышаныс бар.
Гөлназ Хәйбуллина
