Черниковка биҫтәһендәге Герцен урамы 34 адресы буйынса йәшәүсе граждандар сентябрҙә торлаҡты йылытыу өсөн килгән хаҡтарҙы күреп дәғүәләрен белдерә. Фатирҙар йылылыҡ менән тәьмин ителмәһә лә, квитанцияла түләүҙәр тулы ай өсөн иҫәпләнгән. Йылытыу миҙгеле үҙенсәлектәре хаҡында БЮТ каналы хәбәрсеһе Флорида Ким яҙмаһы.
Герцен урамы 34 адресы буйынса йәшәүсе Ксения Пегашеваның фатиры 1 октябрҙән йылытыла башлаған. Ике бала тәрбиәләүсе әсә квитанцияла сентябрь өсөн түләүҙәрҙе күреп шаҡ ҡата. Һыуыҡ бүлмәләр өсөн ҡыш миҙгелендәге кеүек хаҡтарҙы түләргә тура килә.
Черниковҡа биҫтәһендәге баракта йәшәгәндәрҙең күбеһен ошо уҡ һорау борсой. Квитанцияла юғары хаҡтар, сентябрҙә йылытылмаған бүлмәләр өсөн аңлайышһыҙ түләүҙәр.
Ресурс менән тәьмин итеүсе компания белгестәре әйтеүенсә, йылылыҡ өсөн сумма төрлө йорттарҙа төрлөсә иҫәпләнә. Күп фатирлы торлаҡта дөйөм прибор булған осраҡта сарыф ителгән йылылыҡтың күләме ҡарала. Йорт прибор менән йыһазландырылмаған хәлдә уртаса норматив билдәләнә.
Төбәктә йылылыҡ өсөн иҫәпләшеү сентябрҙән апрелгә тиклем ойошторола. Йәғни граждандар квитанцияла килгән сумманы 8 ай дауамында түләп йәйге ваҡытта йылылыҡ өсөн түләүҙәр тураһында онотоп тора. Ҡатмарлы система иҫәптәренә дәғүә белдереүселәр күп булыу сәбәпле, йылылыҡ өсөн хаҡтар буйынса оператив штаб эшләй. Штаб ярҙамында һәр осраҡ буйынса аңлатма алып, айырым йортҡа бәйле мәсьәләне хәл итеү мөмкин.
Флорида Ким
