Хеҙмәткә саҡырылыусы күҙҙәрен лазер ярҙамында төҙәтеп, көҙгө саҡырылыштың тәүге партияһында хәрби хеҙмәткә оҙатылды. Хәрби комиссариаттан БЮТ каналы хәбәрсеһе Әлфинә Килдейәрова.
Ватан һағына баҫыусылар сафы тулылана. Республиканың йыйылыу пунктында буласаҡ ил һаҡсыларын әрме сафына тантаналы оҙатыу сараһы үтте. Егеттәр Рәсәйҙең төрлө өлкәләренә юллана. Кисәге уҡыусы һәм студенттар командалар үтәлешен хәтерҙә ҡалдыра. Алда уларҙы оҙайлы хеҙмәт көтә.
Хәрби хеҙмәткә алыныусылар ентекле әҙерләнгән. Әлшәй районынан 22 йәшлек Булат Шәйәхмәтов операция ярҙамында күреү һәләтен яҡшыртҡан. Барыһы ла бала саҡ хыялы өсөн. Егет ғәскәри хеҙмәттән бушатылғас та, был тармаҡта ҡалырға һәм эске эштәр органдарында эшләргә ниәтләй.
Баймаҡ районынан Байрас Һамарбаев та әрменән һуң хәрби хеҙмәтен дауам итергә уйлай. 18 йәшлек егет Мәскәү өлкәһенә ебәрелә. Башҡалар кеүек уға ла ғәскәр формаһы, юлға алынасаҡ аҙыҡ-түлек, көнкүреш кәрәк-яраҡтары тупланмаһы бирелгән.
Ковид-19 сирен таратмау өсөн сикләү талаптары үтәлә. Дезинфекторҙар, контактһыҙ термометр, һауа елләтеүсе аппараттар, битлек һәм бирсәткәләр. Коронавирус шарттарында сыҡырылыш кампанияһы ошо рәүешле уҙғарыла. Медицина комиссияһын үтеү тәртибе лә үҙгәрештәр кисерә.
Әрме сафтарына саҡырылыусылар ике тапҡыр, комиссариатҡа килеп еткәс һәм хеҙмәт итеү урынына юлланыр алдынан ПЦР тест тапшыра. Һөҙөмтә 15 минут эсендә билдәле була, уны егеттәр айырым бүленгән урында көтә. Башҡортостан көҙгө саҡырылыш кампанияһында 4 мең һалдатты хәрби хеҙмәткә оҙата.
Әлфинә Килдейәрова
