Мутлашыу юлы менән фатир һатыусыларға тарыған ағалы-һеңлеле Ткаченколарҙың эше хоҡуҡ органдары менән берлектә ҡаралды. Хәлде БЮТ каналы хәбәрсеһе Рәмилә Исмәғилева асыҡларға тырышты.
Моргта ятҡан мәйеттең паспортына башҡа фото йәбештереп риэлторҙар фатирҙы үҙ кешеһенә һатып ебәргән. Ә бер нисә айҙан инде торлаҡты 2 миллион 750 мең һумға Ткаченколар һатып алған. Оксана әйтеүенсә, уға тиклем фатир тураһында Росреестарҙан ыңғай мәғлүмәт алғандар. Тик теркәү процессы башланғас ҡына васыят буйынса торлаҡтың элекке эйәһе- 80 йәшлек ханымдың вариҫы барлығы асыҡланған.
Хоҡуҡ органдары ҡара риэлторҙар эшмәкәрлеген тикшергәндә, Өфөлә ҡырҡтан ашыу фатир алдашыу юлы менән һатылыуы асыҡланған. Урланған егерме фатир буйынса енәйәт эше ҡуҙғатылған. Ткаченколарҙың эше прокуратура, ҡала хакимиәте, юристар, Росреестр хеҙмәткәрҙәре менән йыйылышта ҡаралды.
Фатир хужаһы өлкән йәштәге ханым 2019 йылдың 18 майында вафат булған. Адвокат әйтеүенсә, күп функциялы үҙәктә торлаҡты һатыу буйынса документтар 20 майҙа теркәлгән. Ҡара риэлторҙар ғәҙәттә яңғыҙ йәшәгән, балаһы булмаған оло йәштәгеләрҙең фатирҙары менән эш итә.
Һөҙөмтәлә, бер туған Ткаченколар аҡсаһыҙ ҙа, фатирһыҙ ҙа ҡалған. Әммә улар артабан да ғәҙеллек юлламаҡсы. Ҡара риэлторҙарҙан алданыусылар хәрәкәтен ойошторалар. Ултырышта прокуратура хеҙмәткәрҙәре әйтеүенсә, тәфтиш комитетының тикшереү үткәреүенең законлығына баһа биреләсәк.
Хоҡуҡ органдары белдереүенсә, күсемһеҙ милектең йыш һатылыуы ла һағайырға сәбәп. Аҡса күсергәнгә тиклем фатирҙың тарихы менән ҡыҙыҡһынырға кәрәк.
Уҙған йылдарҙа иһә законһыҙ күсемһеҙ милек теркәү менән мөрәжәғәт итеүҙең 44 осрағы билдәле. Был әле рәсми һандар ғына.
Рәмилә Исмәғилева
