“Беҙҙең хәстәрлек” ололарҙы хәстәрләй. “Берҙәм Рәсәй” фирҡәһенең ирекмәндәр үҙәге изоляцияла булған өлкән йәштәгеләргә ярҙам итә. Волонтер Азат Ҡасҡынов әйтеүенсә, бигерәк тә яңғыҙ йәшәүселәр иғтибарға мохтаж. Улар йыш ҡына аҙыҡ-түлек, дарыу килтереүҙе һорап, мөрәжәғәт итә.
Дәүләт Йыйылышы – Ҡоролтай вице-спикеры, “Берҙәм Рәсәй” фракцияһы етәксеһе Рөстәм Ишмөхәмәтов әйтеүенсә, ирекмәндәр хәрәкәтен киңәйтеү мөһим. Коронавирус инфекцияһы таралған мәлдә волонтерҙарҙың эше айырыуса әһәмиәткә эйә, ти ул.
“Беҙҙең хәстәрлек” ирекмәндәр үҙәге былтыр мартта ойошторолдо. Ул 25 ойошманы берләштерә. Үҙәк медицина хеҙмәткәрҙәренә лә ярҙам итә. Мәҫәлән, “Хәстәрлек. Такси” акцияһы барышында ирекмәндәр табиптарҙы ковид-госпиталгә эшкә алып барыуҙы ойоштора. Ирекмәндәр менән бәйләнеш телефоны: 8-800-201-89-03. Шылтыратыуҙар иртәнге сәғәт 9-ҙан киске 6-ға тиклем ҡабул ителә.
