Республикала йәшәгән фин-уғыр халыҡтары Башҡортостан үҫешенә тос өлөш индерә. Улар туған телдәрен өйрәнә, мәҙәниәтен һаҡлай. Был иһә республикала алып барылған милли сәйәсәт һөҙөмтәһе. Шулай тип белдерҙе беҙгә биргән интервьюһында Башҡортостан халыҡтары ассамблеяһы Советы рәйесе Зөһрә Рәхмәтуллина.
Бөгөн Өфөлә “Фин-уғыр халыҡтары ассамблеяһы” йәмәғәт ойошмаһы конференцияһы үтте. Унда милли-мәҙәни ойошмаларҙың эшенә байҡау яһалды.
Республика мариҙарының 70 проценттан ашыуы Мишкә районында йәшәй. Унда быйыл реконструкциянан һуң яңы тарихи-мәҙәни үҙәк бинаһы асылды. Халыҡтар дуҫлығы йорто филиалы рәйесе Алексей Ибуляев әйтеүенсә, хәҙер ул ҡунаҡтарҙың һәм туристарҙың яратҡан урыны иҫәпләнә.
2010 йылғы халыҡ иҫәбен алыу мәғлүмәттәре буйынса, республикала 106 мең самаһы мари, 21 меңдән ашыу удмурт, 26 мең тирәһе мордва йәшәй.
