Барлыҡҡа килгән сират ковид-19 вирусы сикләүҙәренә бәйле. Меңдән ашыу йөк машинаһы бер нисә аҙна дауамында иң эре «Забайкальск – Маньчжурия» ҡоро юл үткәүеленән артабан ҡуҙғала алмай. Йөк ташыусыларға туҡтап торған һәр көн 50 мең һумға төшә.
Ҡытай үҙенең сиктәрен декабрь башында коронавирус таралыу хәүефенә бәйле япҡан. Һөҙөмтәлә әле йөҙҙәрсә водитель тейешле йөктө барып алып тыуған илдәренә ҡайтыу мөмкинлеген көтөп машиналарында йәшәргә мәжбүр. Эксперттар йөк ташыусыларҙың пандемияға бәйле дөйөм юғалтыуҙарын тиҫтәләрсә миллиард һумдар менән баһалай.
Ҡайһы бер йөк машиналары сиратты эргәләге ялан аша йәки ҡаршы һыҙатҡа сығып үтергә тырыша. Мәжбүри туҡталыш водителдәрҙе сығырынан сығара, уларҙың үҙ-ара һуғышҡан саҡтары ла теркәлгән. Таможня хеҙмәткәрҙәре процедураны тиҙләтергә тырышһа ла, Ҡытай Халыҡ Республикаһында сирҙең әленән-әле көсәйеүе сиктәрҙе үтеү ҡағиҙәләрен йәнә ҡатыландырыуы ихтимал.
Гөлдәриә Йосопова
