«Йәш гвардия» ойошмаһы тарафынан «Йәш быуын геройҙары» форумы уҙғарылды. Батыр балалар һәм үҫмерҙәр менән БЮТ каналы хәбәрсеһе Әлфинә Килдейәрова осрашты.
Дүрт малайға ихатала ғына уйнау тар булғас, баҡса артына йүгерәләр. Ҡар ирей башлап, йылғаларҙа боҙ киткән мәл. Бер яңылыш аҙым һәм малайҙарҙың береһе һыу аҫтына китә, уны ҡотҡарам тип бер туғаны ла йылғаға һикерә. Ләкин икеһе лә соҡорға эләгә. Үҙе йөҙә белмәһә лә, Айнур таяҡ табып дуҫтарын сығара ала. Батырлыҡ күрһәткәне өсөн ул «Йәш герой» миҙалы менән бүләкләнә.
Ә бына Күгәрсен районында йәшәүсе икенсе Айнур йәй дауамында ирекмән булараҡ тәбиғәт янғындарын һүндереүҙә ярҙам итә. Йылайыр районында үткән «Аҫылташ» форумында ҡатнашҡан мәлендә республиканың көньяҡ райондарын ут ялмап ала. Дуҫтарын йыйып ул ирекмәндәр сафына баҫа. Йәйгеһен арҡаһына ранец йөкмәп, төтөн эсендә йөрөгәненә ул бер ҙә үкенмәй.
Һыуыҡ һыуға сумырға йәки дөрләп янған йортҡа инергә... Барыһы ла кеше ғүмерен ҡотҡарыу өсөн. Улар бәләгә тарыусылар эргәһенән үтеп кенә китә алмаған. Йыл һайын үткәрелгән «Йәш быуын геройҙар» форумында 30 кеше бүләкләнде.
Бүләкләү сараһында ҡатнашыусылар «Геройҙар беҙҙең арала» фильмын ҡараны. Ҡурҡыу белмәй, үҙ ғүмерҙәрен хәүеф аҫтына ҡуйып батырлыҡ күрһәтеүселәр тиҫтерҙәре өсөн генә түгел, өлкән йәштәгеләргә лә оло ғорурлыҡ.
Әлфинә Килдейәрова
