Дауалау курсы ике-өс аҙнаға иҫәпләнгән. Һәр пациентҡа шәхси һауығыу программаһы төҙөлә, физиотерапия процедуралары ҡаралған. Тиҙҙән учреждение белгестәре коронавирустан һуң сәләмәтлеген нығытырға теләүселәргә дистанцион форматта ла ярҙам күрһәтә башлай. Тулыраҡ БЮТ каналы хәбәрсеһе Гөлназ Хәйбуллина дауам итә.
Дауалау физкультураһында коронавирусты үткәргән пациенттар. Берәүҙәр үпкә шешеүе, икенселәр күкрәк ҡыҫылыуы эҙемтәләрен бөтөрөргә теләй. Күнекмәләр ярты сәғәткә иҫәпләнгән, тын юлдары гимнастикаһына айырыуса иғтибар йүнәлтелә. Республика табип-физкультура диспансерында пациенттарға дарыу-системалар, массаж, ҡоро ванна кеүек процедуралар ҙа ҡаралған. Күптән түгел Рәсимә Кәримова ла аяуһыҙ сирҙе еңеүгә ирешә, тулыһынса һауығыу өсөн реабилитацияның мөһимлеген билдәләй.
Хәлһеҙлек, баш ауыртыу, йоҡоһоҙлоҡ - коронавирусты үткәреүселәрҙең күбеһен бер үк билдәләр борсой. Учреждение белгестәре һүҙҙәренсә, инфекция айырыуса хроник сирлеләр өсөн мәкерле, шуға күрә ауырыу эҙемтәләрен дауалауҙа төрлө алымдар ҡулланыла. Һәр пациент өсөн айырым реабилитация курсы төҙөлә.
Республика табип-физкультура диспансерында 2020 йылдың авгусынан алып коронавирусты үткәреүселәргә реабилитация ойошторола. Ошо ваҡыт эсендә көндөҙгө стационарҙа ярты меңгә яҡын пациент сәләмәтлеген яҡшыртҡан. Тиҙҙән учреждение эшмәкәрлегендә телемедицина технологиялары ла ҡулланыла башлай.
Ковид-19 инфекцияһынан һуң сәләмәт тормошҡа әйләнеп ҡайтыу һәр кемдең ихтыяжында. Күберәк саф һауала йөрөү, хәрәкәттә булыу кәңәш ителә. Психологик ярҙам алыу ҙа - реабилитацияның айырылғыһыҙ этабы. Сөнки күп осраҡта күҙәтелгән депрессия, ҡурҡыу кеүек төшөнсәләрҙелә юҡҡа сығарырға кәрәк.
Гөлназ Хәйбуллина
