Карпинский урамында йәшәүселәр оҙаҡ йылдар глобаль донъяға тоташтырыуҙы һорай, әммә мәсьәләне хәл итеү өсөн электр линиялары ҡамасаулай. Ҡиммәткә төшкән мобиль интернеттың сифаты дистанцион уҡыу талаптарына яуап бирмәй. Тулыраҡ мәғлүмәт киләһе яҙмала.
Карпинский урамы Өфөлә урынлашҡан булһа ла, Интернет менән бәйле ҡатмарлыҡтар төпкөл ауылдарҙы хәтерләтә. Урындағы халыҡ интернет үткәрә алмай ыҙалай. Табипҡа яҙылыу һәм башҡа ҡушымталар менән файҙаланыу өсөн улар мобиль интернет менән файҙалана.
Мобиль бәйләнеш тә биләмәлә насар эшләй. Телефондан һөйләшкән ваҡытта бәйләнеш өҙөлә. Пандемия ваҡытында дистанцион уҡырға мәжбүр мәктәп уҡыусылары өсөн уғата ҡатмарлы.
Интернет үткәреүҙе һорап биҫтәлә йәәшүселәр төрлө инстанцияларға мөрәжәғәт иткән. Әммә электр энергияһы менән тәьмин итеүсе предприятие белгестәре әйтеүенсә, мәсьәләне хәл итеү өсөн Менделеев урамындағы үҙәк электр линиялар ҡамаусаулай.
Электр энергияһы менән тәьмин итеүсе предприятие етәкселеге билдәләүенсә, мәсьәләне хәл итеү өсөн улар эшлекле һөйләшеүҙәргә әҙер. Яҡын арала тикшереүҙәр тамамланғас интернет уҙғарыу өсөн яңы сымдар тәҡдим ителәсәк. Әлегә «Йәшел Сауҡалыҡ» үҙәгендә йәшәүселәргә ни бары мобиль интернет менән файҙаланырға тура килә.
Флорида Ким
