Башҡортостан медицина йәмәғәтселеге Ишембай үҙәк район дауаханаһы ашығыс ярҙам бүлеге хеҙмәткәрҙәренең ҡарарын хупламауын белдерҙе. Бындағы бер төркөм хеҙмәткәрҙәр дауахана етәкселеген 4 февралдән "Итальян забастовкаһын" башлауҙары тураһында иҫкәртте. “Забастовкаға сығыу дезертирлыҡҡа тиң”, - ти Башҡортостандың атҡаҙанған табибы, Рәсәй Дәүләт Думаһы депутаты Римма Үтәшева.
Хеҙмәткәрҙәрҙең дауахана етәкселегенә дәғүәһе тураһында "Действие" профсоюзының Башҡортостандағы координаторы Антон Орлов социаль селтәрҙәге сәхифәһендә белдерҙе. “Пандемияның бишенсе тулҡыны яҡынлашҡанда, медицина хеҙмәткәрҙәрен забастовкаға этәреүҙе диверсия тип атарға мөмкин, - ти республика Хирургтар берлеге рәйесе, Рәсәй һәм Башҡортостандың атҡаҙанған табибы Вил Тимербулатов.
Килеп тыуған мәсьәләне комплекслы хәл итеү мөһим. Ашығыс медицина ярҙамы хеҙмәткәрҙәренә эш хаҡы һәм компенсацияны арттырырға кәрәк.Төнгө ваҡытта эшләгән өсөн түләү күбәйтелергә тейеш. Был турала Һаулыҡ һаҡлау өлкәһе хеҙмәткәрҙәренең республика профсоюзы рәйесе Рауль Халфин белдерә. Әле Ишембай район-ара прокуратруаһы дауахана хеҙмәткәрҙәренең хоҡуҡтарын боҙоу осрағы буйынса тикшереү үткәрә. Башҡортостан Һаулыҡ һаҡлау министрлығында махсус комиссия ойошторолған. Уны ведомство башлығының беренсе урынбаҫары Гөлнара Зиннурова етәкләй.
