Республикала 65 йәштән өлкәндәр өсөн асылған махсус вакциналау урындары 12 меңдән ашыу кеше прививка яһатҡан. Ошондай пункттар былтыр “Берҙәм Рәсәй” фирҡәһе башланғысы менән булдырылды. Әле Башҡортостанда 59 пункт иҫәпләнә. Туймазы районында урынлашҡан күсмә кабинетта “Сәләмәт кесаҙна” ойошторола. “Вакцинаның сирҙән һаҡлауына ышанам. Шуға прививкаға килдем”, - ти 92 йәшлек хеҙмәт ветераны Хәниә Талбетдинова.
“Сәләмәт кесаҙна” көнөндә прививка алыуҙан тыш, белгестәрҙең лекцияларын да тыңларға була. Оло йәштәгеләр араһында бүләктәр уйнатыла. Туймазы ветерандар советы рәйесе Нурулла Биксуров һөйләй.
Өфөлә 65 йәштән өлкәндәр өсөн пункт Өсөнсө быуын Халыҡ университеты нигеҙендә урынлашҡан. Ул 1 февралдән эш башлай. Оло йәштәгеләр иммунизация үтеүгә “Беҙҙең хәстәрлек” үҙәге аша яҙыла ала. Шылтыратыуҙар эш көндәрендә иртәнге 9-ҙан киске 6-ға тиклем ҡабул ителә. Бәйләнеш телефоны: 8-800-201-89-03.
