Уҡ атыу буйынса конкурс Сибай мәктәп-интернатында уҙҙы. Был осраҡлы түгел. Сөнки мәғариф учреждениеһында алты йыл дауамында уҡ атыу түңәрәге эшләп килә. Күптән түгел белем усағы ҡарамағында «Ирәндек уҡыусылары» клубы ла асылған. Унда балалар ҙа, өлкән быуын вәкилдәре лә ҙур теләк менән шөғөлләнә.
Уҡ атыу буйынса ярыш алдынан тарихҡа байҡау яһала. Башҡорт халҡы борон-борондан мәргәнлеге менән дан тотҡан, биленән уҡ-янын төшөрмәгән. Башҡортостандың мәғариф алдынғыһы, Сибай гимназия-интернатының физик тәрбиә уҡытыусыһы Хөрмәт Таһиров ошо йолаларҙы һаҡлау, йәш быуынға тапшырыу маҡсатын ҡуя ла инде. Ул үҙе уҡтан атыу буйынса ҡала, республика конкурстары еңеүсеһе.
Уҡ атырға балалар ҙа, өлкәндәр ҙә теләп өйрәнә. Түңәрәктә шөғөлләнеүселәр фекеренсә, был шөғөл кәүҙәне тура тоторға, маҡсатҡа өлгәшергә өйрәтә. Хатта күреү һәләте лә яҡшыра. Ә иң мөһиме: был спорт төрө кешелә рухи ныҡлыҡ тәрбиәләй.
Уҡ атыу түңәрәге Сибай гимназия-интернатында хәҙер алтынсы йыл уңышлы эшләп килә. Тәүҙә шөғөлләнеүселәр бәләкәй генә бүлмәне биләһә, хәҙер улар ҡарамағына иркен, йыһазландырылған зал тапшырылған. Күптән түгел бында «Ирәндек уҡсылары» клубы эш башлаған. Белем усағы етәкселеге фекеренсә, уҡыусыларҙың яратҡан шөғөлөн ҡеүәтләү, яңы бейеклектәргә этәреү шарт.
Уҡ атыу түңәрәгендә шөғөлләнеүселәр ярыштар ойоштороп ҡына ҡалмай, уҡ, ян яһау нескәлектәре менән дә таныша. Етәкселәре Хөрмәт Таһиров әйтеүенсә, берҙән, балалар ваҡытын файҙалы уҙғара. Икенсенән, йәш быуын халҡыбыҙҙың боронғо шөғөлөн үҙләштерә һәм уны тергеҙеүгә үҙ өлөшөн индерә. Быуындар күсәгилешлеге тап ошондай сараларҙан үрелә лә инде.
Рәмзиә Кәримова
