Дарыухана бер ҡушымтала. Төпкөлдә урынлашҡан ҡайһы бер фельдшер-акушерлыҡ пунктттарында дарыуҙарҙы онлайн һатып алырға мөмкин. Медикаменттарҙы курьер бер көн эсендә өйгә тиклем алып килә. Был Башҡортостандың Һаулыҡ һаҡлау министрылығы менән "СберЕаптека"ның берҙәм проекты. Теманың дауамы БЮТ каналы хәбәрсеһе Әлфинә Килдейәрова яҙмаһында.
Татьяна Чесалова ике ҡыҙ әсәһе. Фельдшер-акушерлыҡ пунктына ул 4 йәшлек Евгенияға прививка эшләтеү өсөн килгән. Сергеевка ауылы ҙур булмаһа ла, бында 648 кеше, шул иҫәптән 150-нән ашыу бала һәм 60 йәштән оло булган 131 кеше йәшәй. Халыҡты ауылдағы ФАП хеҙмәтләндерә.
Илшат Сәғдинов "Ауыл фельдшеры" программаһы буйынса эшкә ҡайтҡан белгес. Уның һүҙҙәренсә, урында дарыухана юҡ, шуға күрә халыҡҡа Өфөгә йөрөргә, йә кеше аша медикаменттар алдырырға тура килгән. Йыл башынан алып был хәл үҙгәрә, Дим районындағы ҡала клиник дауаханаһына ҡараған ФАП "СберЕАптека" ҡушымтаһы менән килешеү төҙөгән.
Программа буйынса дарыуҙарға заказды фельдшер үҙе йыя. Кәрәкле препараттарҙы һайланғандан һуң, курьерҙың киләсәк ваҡытын да билдәләргә мөмкин. Ҡушымта Рәсәй буйынса 70 төбәктә, шул иҫәптән Башҡортостанда ла эшләп килә. Йыл башынан алып республиканың Һаулыҡ һаҡлау министрлығы менән "СберЕаптека" программаһы махсус проектҡа старт бирә. Әле уны һынап ҡарау төбәктең 4 биләмәһендә ойошторола.
Өфө районынан тыш, пилот проекты Дим районы, Нефтекама һәм Дәүләкән ҡалаларына ҡараған ФАП-тарҙа һынап ҡарала. Уңышлы килеп сыҡҡан осраҡта республиканың башҡа фельдшер-акушерлыҡ пункттарында ла дарыуҙарҙы онлайн һатып алырға мөмкин булыуы ихтимал.
Әлфинә Килдейәрова
