Хеҙмәт баҙарында. Пенсия алды йәшендә һәм хаҡлы ялда булған өлкәндәр өсөн Өфө ҡалаһы мәшғүллек үҙәгендә вакансиялар йәрминкәһе үтте. Был хаҡта тулыраҡ киләһе яҙмала.
Өфө ҡалаһы мәшғүллек үҙәге бинаһы тышынан уҡ эш эҙләүсе өлкәндәрҙе тап итергә була. 69 йәшлек Миңзәлә Кәримова үҙенә ашнаҡсы, компрессорҙа эшләүсе машинист кеүек һөнәр эҙләй.
Риф Хужахмәтовтың хеҙмәт стажы 40 йыл. Өлкәндәр өсөн хеҙмәт вакансиялары йәрминкәһе хаҡында ул Башҡортостан юлдаш телевидениеһы каналында иғланды күреп килгән.
Өфө мәшғүллек үҙәгендә ойошторолған вакансиялар йәрминкәһенә һикһәнгә яҡын өлкән йәштәге кеше килде Уларға эш биреүселәр тарафынан ҡырҡтан ашыу эш урыны тәҡдим ителде.Водитель, урам һепереүсе, машинист, ярҙамсы эшсе, тәрбиәсе, ҡарауылсы вакансияларынан тыш, страховкалаусы һөнәре буйынса эш биреүсе ойошма вәкиле лә бар ине.
Эш биреүселәр 15 974 һумдан алып, 65 000 һумға тиклем хеҙмәт хаҡы булған вакансиялар тәҡдим итте. 26 кешегә әңгәмәләшеү өсөн йүнәлтмә тапшырылды.
Вакансиялар йәрминкәһе барышында шулай уҡ 15 кеше профориентация буйынса консультация алды, 34 эш эҙләүсе үҙен ҡыҙыҡһындырған һөнәр буйынса эш урыны тапты.
Өфө ҡалаһы мәшғүллек үҙәгендә һөнәрен үҙгәртергә теләүселәр менән профессиональ психологтар, профориентологтар эшләй. Улар эш эҙләүселәргә тестар, профориентация буйынса консультациялар үткәрә, резюме төҙөшәргә ярҙам итә.
Гүзәл Борханова
