Өфөнөң «Московский» торлаҡ комплексы 2019 йыл аҙағында сафҡа инергә тейеш ине. Ләкин төҙөлә башлаған йорттар биш йылдан ашыу бер килеш тора. Төҙөлөштә өлөшләтә ҡатнашыусылар мәсьәләһе менән БЮТканалы хәбәрсеһе Әлфинә Килдейәрова танышты.
Лилиә Мырҙабаева нигеҙ ҡаҙылған саҡта уҡ «Московский» торлаҡ комплексында фатир һатып ала. Тәүҙә төҙөлөш графикҡа ярашлы барған кеүек тойолһа ла, биләмәлә күптән инде техника ла, төҙөүселәр ҙә күренмәй.
Рәзилә Маҡарова ла оҡшаш хәлгә тарый. 20 йыл сит төбәктә йәшәгәндән һуң, тыуған яғына әйләнеп ҡайтырға планлаштырған ханым 2018 йылда төҙөлөш компанияһы менән килешеү төҙөп, фатир өсөн тулыһынса аҡсаһын да түләп ҡуя. Ләкин ҡайтырға ваҡыт еткәс, Сун-Ят-Сен урмандағы «Московский» торлаҡ комплексында алған фатиры проблемалы объектҡа әйләнә. Ике бәлиғ булмаған бала менән ул төпләнер урын тапмай, ҡуртымға алынған фатирҙа йәшәргә мәжбүр.
«Московский» торлаҡ комплексын «Госстрой» компаниялар төркөмө төҙөй башлай. Объекттарҙы ваҡытында сафҡа индермәгәне өсөн 900-ҙән ашыу кеше зыян күргән. Әле уларҙың мәсьәләһе менән төҙөлөштә өлөшләтә ҡатнашыусылар фонды шөғөлләнә.
Мәсьәләләрҙе Биләмәләрҙе үҫтереү федераль фонды механизмы буйынса хәл итеү планлаштырыла. Арбитраж суды тикшеренеүҙәренән һуң, «Московский» торлаҡ комплексын төҙөгән «Городские проекты», «Зеленая роща», «Высотки» ойошмалары банкрот тип иғлан ителде. 5 апрель компаниялар группаһына ингән «Литер 4» ойошмаһының яҙмышы хәл ителәсәк.
Тәү сиратта төҙөлөш техник экспертизаһы талап ителсәк. Әгәр компенсация түләү кәрәк тип табылһа, уның күләме баҙар хаҡтарына яҡын буласаҡ, ти фонд етәксеһе. Федераль ҡарар буйынса компенсацияларҙы һанау ысулы бар. Уға ярашлы, фатирҙың ниндәй ҡатта урынлашҡаны, бүлмәләр һаны, майҙаны һәм ни тиклем төҙөлөп бөткәнлеге иҫәпкә алынасаҡ. Хисаплауҙы федераль фонд белгестәре башҡара.
Әлфинә Килдейәрова
