Һуңғы өс йылда Башҡортостанға йәлеп ителгән инвестициялар күләме 31,3 процентҡа артҡан. Сағыштырып ҡарағанда, ил буйынса был күрһәткес 9,4 процентҡа ғына күтәрелә. Һуңғы тапҡыр республикала инвестицияларҙың ошондай үҫеш кимәле 2005-2008 йылдарҙа ғына күҙәтелгән.
Был турала Хөкүмәт йортонда үткән оператив кәңәшмәлә билдәләнде. Былтыр айырыуса һөҙөмтәле эш алып барылған, үҙләштерелгән инвестициялар күләме буйынса Башҡортостан Рәсәй төбәктәре араһында ун беренсе урынға күтәрелгән.
Иҡтисадҡа килгән инвестициялар һөҙөмтәһендә яңы предприятиелар асыла, хеҙмәт урындары булдырыла. Радий Хәбиров һуңғы һигеҙ йылда тәүге тапҡыр республикала халыҡтың миграция үҫешендә ыңғай динамика күҙәтелеүен дә билдәләне. 2021 йыл һөҙөмтәләре буйынса Башҡортостанға күсеп килеүселәр китеүселәргә ҡарағанда 14 879 кешегә артҡан.
Сағыштырып ҡарағанда, 2020 йылда миграцияның киреһенсә кәмеүе күҙәтелгән. Республика етәкселегенең яңы производстволар булдырыу буйынса алып барған социаль-иҡтисади сәйәсәте төбәктән халыҡтың күсеп китеү тенденцияһын туҡтатырға ярҙам итә.
Гөлназ Хәйбуллина
