Иҡтисадтағы хәҙерге ҡыйынлыҡтарҙы хәл итеүҙә шәхси бизнес төп ролде уйнарға тейеш. Шуға эшҡыуарҙарға мөмкин тиклем күберәк ирек бирелә, административ баҫым кәметелә, тип белдерә Республика Хөкүмәте Премьер-министры Андрей Назаров. Әле төбәктә 129 меңдән ашыу бәләкәй һәм урта эшҡыуар иҫәпләнә. Йыл башынан улар һаны 2 процентҡа артҡан. Үҙмәшғүлдәр ҙә күбәйә. Эшҡыуарҙар бюджетҡа яҡшы килем килтерә. Былтыр бизнес 12 миллиард һумдан ашыу һалым түләгән. Әле республикалағы һәр 8-се кеше йәғни 513 меңдән ашыу хеҙмәткәр эшҡыуарҙарға эшләй. Бөгөн бизнесҡа ярҙам итеү буйынса сираттағы саралар әҙерләнә. Эшҡыуарҙарға финанс ярҙам күрһәтелә, һалым түләүҙән бушатабыҙ, льготалар була, тип хәбәр итә Андрей Назаров.
