Бөгөн Силәбелә «Трактор» һәм «Салауат Юлаев» командалары араһындағы серияла беренсе уйын үтте. Дәғүәселәрҙән айырмалы юлаевсылар был юлы ла боҙға легионерҙарһыҙ сыҡты.
Осрашыуҙың яҙмышын берҙән-бер гол хәл итте. Икенсе осор башында Степан Санников индергән шайба юлаевсыларға 1-0 иҫәбе менән еңеү килтерҙе. Шулай итеп Башҡортостан командаһы серияла алға сыҡты. Был уйын ҡапҡа һаҡсыбыҙ Александр Шарыченков өсөн дә тарихта ҡалды. Ул үҙ карьераһында тәүге тапҡыр плей-оффта бер шайба ла үткәртмәне. 19 мартта яҡтар араһындағы икенсе осрашыу ҙа Силәбелә үтә.
