Ил президенты Владимир Путин ғаилә, ауыл һәм Алыҫ көнсығыш ипотекалары буйынса льготалы ставкаларҙы һаҡлап ҡалырға ҡушты. Ә бына яңы төҙөлгән йорттарҙан фатир һатып алғанда ставка 7 проценттан 12 процентҡа тиклем арта.
Шул уҡ ваҡытта төбәктәрҙә был программа буйынса иң юғары кредит күләме алты миллион һум тәшкил итәсәк. Власть органдары быйыл да торлаҡ төҙөлөшө темптарын, ипотека кредиттары портфелен үҫтерергә ниәтләй. Үҙгәрештәргә бәйле Өфөлә «Күсемһеҙ милек баҙары киләсәге» тип исемләнгән түңәрәк өҫтәл үтте.
Осрашыуға башҡарма власть органдары вәкилдәре, төҙөлөш компаниялары етәкселеге, депутаттар саҡырылды. Белгестәр торлаҡ хаҡы, ипотека ставкалары буйынса фекер алышты.
Былтыр Башҡортостанда 2 миллион 900 мең квадрат метр торлаҡ сафҡа индерелгәйне. Пандемия булыуға ҡарамаҫтан, тарихи рекорд ҡуйыла. Төбәктең төҙөлөш һәм архитектура министрлығынан хәбәр итеүҙәренсә, республикала төҙөлөш материалдарына ҡытлыҡ күҙәтелмәй. Продукцияның 90 проценты урындағы предприятиеларҙа етештерелә. Объекттарҙың ваҡытында файҙаланыуға тапшырылыуы ла контролдә тотола.
Гөлназ Хәйбуллина
