Шаран районы Баҙғыя ауылында йәшәгән умартасы Климентий Романов бал ҡорттарын ҡышлатыу һәм үрсетеүҙең яңы ысулын һынай. Тәжрибәле умартасы фекеренсә, нәҙекәйбилдәр саф һауаны ни тиклем иртәрәк һулай башлаһа, уңыш та мулыраҡ була. Тулыраҡ киләһе яҙмала.
Өсөнсө йыл инде Климентий Романов умарталарын йылы баҙға индермәй, саф һауала ҡалдыра. Тәжрибәле умартасы фекеренсә, бал ҡорттары өсөн һыуыҡтан да бигерәк, дымлы һауа ҡурҡыныс. Шуға ла умарталарҙы шартына килтереп ҡышҡылыҡҡа япҡандан һуң, ир уларҙы ҡарға күмеп сыға. Әммә февраль урталарында уҡ умарталар тирә-яғы кире ҡарҙан әрселеү менән бал ҡорттары өсөн яңы миҙгел башлана.
Умартасылыҡ кәсебе Романовтар ғаиләһендә быуындан-быуынға күсә килә. Әле Климентий Романов атаһынан өйрәнгән һәнәрҙе улы Олегҡа тапшыра. Ҡыш буйы улар аталы-уллы үҙҙәренең оҫтаханаһында умарта рамдары һәм кәсеп өсөн башҡа кәрәк-яраҡтар эшләй. Атанан күргән уҡ юнған тигәндәй, Олег Романов та умартасы һөнәрен 4 ҡыҙына тапшырырға хыяллана.
Йыл һайын Романовтар 2 тоннаға яҡын бал ала. Ҡасандыр 2 күстән башланған хужалыҡта хәҙер умарталар 100-ҙән ашҡан. Татыу һәм тырыш ғаилә татлы тормошҡа шулай ирешә.
Әлфинә Андреева
