Бөрйән районы Иҫке Собханғол ауылында эшләп килгән спорт үҙәге тәрбиәләнеүселәре республика һәм ил кимәлендә еңеүҙәр яулай. Грепплинг һәм панкратион спорт төрө менән шөғөлләнеүсе егет-ҡыҙҙар заманса шарттарҙа күнекмәләр яһай. Теманың дауамы киләһе яҙмала.
Спорт – сәләмәтлек нигеҙе. Былтыр көҙҙән алып Иҫке Собханғол халҡы «Яугир» спорт үҙәгендә грепплинг һәм панкратион спорт төрөн үҙләштерә. 4 йәштән алып һәр теләгән кеше өсөн бында бер нисә төркөм булдырылған. Арыҫлан Барыев тәүҙә үҙ-үҙеңде яҡлау дәрестәренә йөрөй, һуңынан панкратион менән ҡыҙыҡһына башлай. Ҡыҫҡа ваҡыт эсендә ул Башҡортостан чемпионы исемен дә яулаған.
«Яугир» спорт үҙәге тәрбиләнеүселәре өсөн Өфөлә үткән грепплинг ярышы ифрат һөҙөмтәле була. Бөрйән районынан бәйгелә 19 кеше ҡатнаша, уларҙың 11-е алтын һәм 4-е көмөш миҙал яулай.
Тренер һүҙҙәренсә, яҡшы һөҙөмтәләрҙең нигеҙе – ул тырышлыҡ. Өҫтәүенә, «Урал» физкультура-һауыҡтырыу комплексында спорт менән шөғөлләнеү өсөн заманса шарттар булдырылған.
Иҫке Собханғолдағы физкультура-һауыҡтырыу комплексында волейбол, футбол һәм башҡа спорт төрҙәре буйынса ла түңәрәктәр эшләй. Көнөнә 40-ҡа яҡын кеше сәләмәтлеген бассейнда нығыта. Спорт менән шөғөлләнеүселәр йәрәхәт алмаһын һәм кәрәк саҡта тиҙ ярҙам күрһәтер өсөн физкультура-һауыҡтырыу комплексында медицина хеҙмәткәрҙәре эшләй.
«Яугир» үҙәге тәрбиәләнеүселәре 4 апрелдә Өфөлә үтәсәк грепплинг ярышына әҙерләнә. Унда үҫмерҙәр көс һынашасаҡ.
Әлфинә Килдейәрова
