Был беренсе апрель шыярыуы түгел. Бының өсөн ни бары Рәсәй Банкының тиҙ иҫәпләшеү системаһын ҡуллана башлау ҙа етә. Электрон аҡса әйләнешенең был төрө һатып алыусылар өсөн дә отошло, ти белгестәр. Бигерәк тә сит ил иҫәпләшеү системалары ғәмәлдән сыҡҡан мәлдә. Тиҙ иҫәпләшеү системаһы ниндәй уңайлыҡтар тәҡдим итә? Был һорауға яуап киләһе яҙмала.
Виза сығарылмай, Мастеркардты терминал ҡабул итмәй тип ҡайғыраһы түгел хәҙер. Баҡтиһәң үҙебеҙҙә лә ҡулаҡсаһыҙ иҫәпләшеү саралары етәрлек. Төрлө төҫтәге был өсмөйөштәр күптәнге таныш мобиль ҡушымта. Ләкин ҡайһы берҙәребеҙ уның барлыҡ мөмкинлектәрен белеп тә етмәй. Быға тиклем ул онлайн банкка инеп телефон номерына комиссияһыҙ аҡса оҙатыу өсөн генә ине.
Йәғни пластик карталарҙың барлығын онотоп та бөткән йәштәр өсөн сит ил иҫәпләшеү системаларына юл ябылған мәлдә СБП уңайлы альтернатива. Шулай ҙа уны файҙаланыуҙан тәү сиратта эшҡыуарҙар ота. Уның аша үткән һатып алыуҙар өсөн комиссия бермә бер кәмене.
Өҫтәүенә бәләкәй һәм урта эшҡыуарлыҡ субъекттары тотолған комиссияны тулыһынса ҡайтара ала. Был мөмкинлек 1 июлгә тиклем оҙайтылды. Улай отошло булғас нишләп эшҡыуарҙарҙың барыһы ла ошо мөмкинлек менән файҙаланмай? Баҡтиһәң, финанс ойошмалар тиҙ иҫәпләшеү системаһына инергә ашыҡмай. Әммә беренсе апрелдән был етешһеҙлек ҡануниәт нигеҙендә хәл ителә. Илдәге барлыҡ банктар ҙа СБП аша иҫәпләшеү мөмкинлеге ойошторорға бурыслы.
Банктарҙың барыһы ла системаға инеү менән СБпэй ҡушымтаһы ла эшләй башлаясаҡ. Был инде телефонды терминалға яҡын килтереп кенә, бер ниндәй төймәгә баҫмай һатып алыу мөмкинлеге бирә. Йәғни эшмәкәрлеген туҡтатҡан Эплпэй, гуглпэйҙарға ҡәтғи яуап. Өҫтәүенә ул сит ил аналогтары шикелле картаға бәйле түгел. СБпэй тура банк иҫәбенә беркетелә. Йәғни картаң виза булһынмы, мастеркардмы, мөһим түгел.
Айнур Кәбиров
