Был турала бөгөн матбуғат конференцияһында Башҡортостандың ер һәм мөлкәт мөнәсәбәттәре министры Наталья Полянская белдерҙе.
Мәғлүм булыуынса, ташлама менән файҙаланыусы кешеләргә һайлау мөмкинлеге бирелгән, ер йәки 250 мең һум аҡса алырға була. Әлеге ваҡытта сиратта 18 мең тирәһе кеше иҫәпләнә, 74 проценттың проблемаһы хәл ителгән.
Аҡсалата түләүҙәр республикала ишле ғаиләләргә һәм инвалид бала тәрбиәләгәндәргә бирелә. Уны юллау өсөн район хакимиәтенә мөрәжәғәт итеү шарт. Әлбиттә, билдәләнгән лимит бар. 2020 йылда бөтәһе 200, былтыр 400 сертификат бүленгән. Быйыл иһә был һан 600-гә еткерелгән, документтар аҙна дауамында тапшырыла. Эштең яйға һалыныуы системаның электрон форматҡа күсеүе менән дә бәйле.
Наталья Полянская белдереүенсә, Башҡортостандың бар мөлкәтенә иҫәп-хисап яһалған. Хәҙер улар бөтәһе лә рәсми рәүештә теркәлгән, реестрға индерелгән. Республика ҡарамағындағы милекте иҫәпләү эш башлау өсөн буш биналар, йәки ер участкалары эҙләгән эшҡыуарҙар өсөн дә уңайлы. Бынан тыш, республика шифахана-профилакторийҙарына ял итеүселәр бүлмәләрен арттырыу бурысы ла йөкмәтелгән. Сөнки әле эске туризм үҫешә, быйыл ял итеүселәрҙең күберәк булыуы көтөлә.
Рәмзиә Кәримова
