Белорет районында эшләп килгән предприятиеларҙың береһендә юғары технологиялы тауар етештереү яйға һалына. Ул фитнесс залдар өсөн йүгереү юлы.
Заманса спорт тренажерҙары райондың Сермән ауылында йыйыла. Машина-трактор станцияһының элекке цехтарын үҙгәртеп ҡорғандан һуң фитнесс һәм физкультура менән шөғөлләнеүселәргә тәғәйенләнгән ҡорамалдар етештергән предприятие барлыҡҡа килгән. Элек был индустрия тауарҙары тулыһынса тиерлек сит илдәрҙән индерелһә, хәҙер импортҡа алмаш бар.
Яңыраҡ Сермән оҫталары фитнесс залдар өсөн йүгереү юлдарын йыйып ҡарарға булған. Йыһан аппараты булмаһа ла был тауарҙы юғары технологиялы тип атарға мөмкин. Ул физик күнегеү яһаусының хәлен күҙәтергә, ҡан баҫымын, йөрәк тибешен һәм хатта, тән өлөштәренә төшкән көсөргәнешлекте үлсәү мөмкинлеген бирә. Уны һанлы технологиялар һәм спорт йыһазының симбиозы тиергә лә мөмкин.
Заманса тренажер Башҡортостандың Белорет районында йыйылған. Электроникаһы, хатта компьютер программаһын да урындағы белгестәр яҙған. Әле йүгереү юлы сериялы етештереү алдынан һынау үтә.
Көнбайыштың иҡтисади ҡыҫымы артҡан осорҙа Рәсәй етештереүселәренең импортҡа алмашҡа юғары технологиялы тауарҙы әҙерлек һыҙығына ҡуйыуы санкцияларҙың мөмкинлектәре осоро булыуына тағы бер дәлил. Импортҡа алмашҡа үҙебеҙҙең тауар килә. Баҙарҙа ул мотлаҡ урынын табыр, ти белгестәр.
Рафиҡ Әхмәтшин
