Йыл башында Өфөлә йәшәүсе Кәримовтар торлаҡ шарттарын яҡшыртыу өсөн дәүләттән сертификат ала. Ләкин Ҡала хаимиәте аҡсаны күсерергә ашыҡмай. Хәҙер күп балалы ғаилә ике ипотека түләргә бурыслы. Теманың дауамы БЮТ каналы хәбәрсеһе Әлфинә Килдейәрова яҙмаһында.
Ун йылдан ашыу табип булып эшләгән Илдар Кәримовҡа пациенттар ғүмере өсөн генә түгел, ә үҙ хоҡуҡтары өсөн дә көрәшергә тура килә. Йәш ғаилә өй шарттарын яҡшыртыу маҡсатында 2013 йылда маҡсатлы программаға сиратҡа баҫа. Ниһайәт, быйыл сертификатҡа таныҡлыҡ ҡағыҙын алыуға ла өлгәшәләр. Тик Кәримовтар иртәрәк шатланған булып сыға.
Илдар Кәримов дәүләттән бүленгән 1 миллион 680 мең һумлыҡ сертификатты яңы фатир һатып алыу өсөн ҡулланырға ниәтләй. Ләкин Ҡала хакимиәте әле йәшәп ятҡан фатирҙың ипотекаһын, йәғни 280 мең һумды түләп бөтөрөргә тәҡдим итә. Ә ҡалған сумманың яҙмышы - билдәһеҙ. Күп балалы ғаилә бының менән риза түгел. Өҫтәүенә, яңы фатирға килешеү төҙөлгән, сертификатты ҡулланыу өсөн республиканың Төҙөлөш һәм архитектура министрлығынан ризалыҡ та алынған.
Йәшәү шарттарын яҡшыртыу программаһы сиктәрендә ипотекаға юлланған фатирҙың төҙөлөшөн Кәримовтар тәҙрә аша күҙәтә. Уның алыҫ булмауы – күп балалы ғаиләгә бик уңайлы. Эргәлә балалар баҡсаһы ла, мәктәп тә эшләп килә. Яңы өс бүлмәле фатир киләһе йылдың башында сафҡа инер тип көтөлә. Тик бына өй туйлауға әҙерләнеү урынына Кәримовтар судҡа ҡағыҙҙар юллай башлаған.
Мәсьәләне асыҡлау маҡсатында Өфө ҡалаһы хакимиәтенә мөрәжәғәт иттек.
Ҡала хакимиәтенән белдереүҙәренсә, йәш ғаиләгә 300 мең һумға яҡын сумма күсерелеүе ихтимал, ҡалғаны республика бюджетынан ҡайтарыласаҡ. Әммә торлаҡ өсөн тәғәйенләнгән законлы сертификатты Кәримовтар суд аша алырға ниәтләй.
Әлфинә Килдейәрова
