«ВорлдСкилз» һөнәри оҫталыҡ ярышының «Умартасылыҡ» компетенцияһы буйынса финалы Мәләүездә үтә. Үҙебеҙҙән башҡа, бәйгелә Рәсәйҙең Алтай, Удмурт, Татарстан, Ингушетия республикаларынан, Красноярск крайы, Новосибирск, Ырымбур өлкәләренән конкурсанттар өс көн барышында көс һынаша. Йәш белгестәрҙең көсөргәнешле бәйгеһен БЮТ каналы хәбәрсеһе Рәзилә Ғиниәтуллина күҙәтте.
Берәүҙәр балда ҡатнашмалар булыу-булмауын асыҡлаһа, икенселәрҙең бурысы - Джентер кәрәҙе ярҙамында ҡорт инәһен сығарыу. Был процесста ғәмәлдәр тәртибен боҙорға ярамай, ти Башҡортостан вәкиле Айназ Хөснөтдинов. Һөнәре буйынса төҙөүсе булһа ла, ул «Умартасылыҡ» компетенцияһында сығыш яһай. Егет өсөн был нәҫелдән килгән кәсеп.
Пробиркалағы балға аҡбур, крахмал кеүек төрлө матдәләр ҡушылған. Бында төрлө төҫлө һәм консистенциялы бал бар. Конкурсанттың бурысы төрлө реактивтар ярҙамында иң сифатлы балды билдәләргә ине.
Майҙанда илдең төрлө төбәктәренән йәш белгестәр сығыш яһай. Күнекмәләр махсус симуляторҙарҙа үтә. Тере ҡорттарҙы хәүефһеҙлек күҙлегенән ҡулланыу мөмкин түгел. Шарттар тулыһынса ысынбарлыҡҡа тура килә. Йәш белгестәрҙең әҙерлеге лә юғары.
Чемпионат өс көн дауам итәсәк. Конкурстанттар алдында тағы ла бал ҡорттарҙы дауалау күнекмәһе тора. Мәләүездәге бәйге майҙаны конкурс һөҙөмтәһендә һайланған. Бал төбәктең милли бренды булып иҫәпләнгәндә, башҡаса булыу мөмкин түгелдер.
Рәзилә Ғиниәтуллина
