Тимер юл вокзалында уларҙы төрлө министрлыҡ-ведомство вәкилдәре, ирекмәндәр ҡаршы алды. Тыуған йорттарын ташлап китергә мәжбүр булған граждандарҙы Өфө шифаханаларының береһенә ваҡытлыса урынлаштырыу ҡаралған. БЮТ каналы хәбәрсеһе Гөлназ Хәйбуллина дауам итә.
«Симферополь-Пермь» йүнәлеше буйынса хәрәкәт иткән поезд Өфөлә туҡтағас Донецк халыҡ республикаһы һәм Херсон өлкәһенән күсенергә мәжбүр булған ун ете кеше, шул иҫәптән өс бала перронға сыҡты. Барыһының да күҙҙәрендә - билдәһеҙлек. Шулай ҙа хәүефләнергә урын юҡ. Тимер юл вокзалында уларҙы йылы ҡаршы алдылар. Һәр кем ваҡытлыса йәшәү урыны менән тәьмин ителәсәк.
Махсус операция башланғандан алып Башҡортостанға Донбастан һәм Украина төбәктәренән етмешкә яҡын кешенең үҙаллы килеүе билдәле. Улар башлыса туғандарында, дуҫтарында урынлашҡан. Бөгөн иһә республика йәнә бер төркөмдө ҡаршы алды.
Тимер юл вокзалы биләмәһендә Донбастан һәм Украинанан килеүселәр коронавирусҡа эскпресс-тест тапшырҙы. Тикшереү һөҙөмтәләре буйынса барыһы ла сәләмәт булыуы билдәләнде.
Әйткәндәй, был аҙнала Башҡортостанға тағы ла бер эшелон килеүе көтөлә.
Бөгөн ҡаршы алынған тәүге төркөм Өфө шифаханаларының береһенә урынлаштырыла. Унда уларға бушлай туҡланыу ойошторола. Миграция, халыҡты социаль яҡлау хеҙмәте вәкилдәре лә консультациялар уҙғара
Рәсәй Хөкүмәте ҡарарына ярашлы, Башҡортостанға Луганск һәм Донецк халыҡ республикаларынан ике меңгә яҡын кеше килергә тейеш. Мәжбүри күсенеүселәргә бушлай медицина, психологик һәм юридик ярҙам күрһәтеү ҡаралған. Шулай уҡ балаларҙы мәғариф учреждениеларына урынлаштырыу мәсьәләһе лә хәл ителәсәк.
Гөлназ Хәйбуллина
