Табиптарҙың күсмә бригадаһы ике көн Таштамаҡ ауыл советы биләмәһе халҡын хеҙмәтләндерәсәк. БЮТ каналы хәбәрсеһе Рәмилә Исмәғилева һаулыҡ һағында тороусылар һәм сәләмәтлеген тикшертергә килеүселәр менән аралашты.
Людмила Тимофеева Таштамаҡ ауылында фельдшер булып 35 йыл эшләй. Өс ауылды хеҙмәтләндергән табип бөгөн фельдшер-акушерлыҡ пунктында халыҡты ғәҙәттәгесә, бер үҙе генә ҡабул итмәй. Уға ярҙамға республика медицина учреждениеларынан төрлө белгестәр бригадаһы килгән. «Сәләмәтлек автопоезы» Таштамаҡта беренсе тапҡыр.
Күсмә автопоезд бригадаһында невролог, эндокринолог, офтальмолог,гинеколог, һәм башҡа белгестәр. Улар иртәнге сәғәт туғыҙҙан дүрткә тиклем эшләй. Анализдар бирергә, прививка яһатырға ла мөмкин.
Медицина тикшереүе үтергә килеүселәр башлыса өлкән йәштәге ханымдар. Ғәҙәттә, уларға дауаханаға район үҙәгенә, йә Стәрлетамаҡҡа барырға тура килһә, был юлы бөтә уңайлыҡ ауыл үҙәгендәге майҙанда.
Заманса медицина техникаһы менән йыһазланған автобустарҙа һәм фельдшер-акушерлыҡ пунктында ауыл халҡы төрлө йүнәлештәге белгестәргә үҙҙәрен борсоған һорауҙарын биреп ҡалырға тырыша.
Күрше ауылдарҙа йәшәүселәрҙе алып килеү өсөн автобус бүленгән. «Сәләмәтлек автопоезы» ике көндән Степановкаға юллана. Ауырғазыла мобиль бригада ике аҙна эшләй, артабан Ғафури районына күсә.
Рәмилә Исмәғилева
