Федоровка районы Бала Сытырман ауылы мәҙәниәт йортонда «Айгүзәл» башҡорт халыҡ фольклор ансамбленең 20 йыллыҡ юбилейына арналған байрам сараһы ойошторолдо.
Ансамбль ағзалары тамашасыларға күп йыллыҡ репертуарҙа тупланған йыр-моң, халыҡ йолаларына ҡоролған сығыштарын тәҡдим итте. Яңы Яуыш ауылы мәктәбе директоры Ишморат Маликов етәкселек иткән ижади коллектив район һәм республика кимәлендә үткән төрлө конкурс-фестивалдәрҙә уңыш ҡаҙана.
Халҡыбыҙҙың бай йөкмәткеле боронғо йолаларын тергеҙеп уларға яңы һулыш бирә. Ямғыр теләү, йортҡа нигеҙ ҡороу, бәпескә кейем тегеү – ансамбль репертуарындағы һәр сығышҡа тәрән мәғәнә һалынған. Байрам көндө «Айгүзәл» таланттарына район хакимиәтенең Маҡтау ҡағыҙҙары, Рәхмәт хаттары, иҫтәлекле бүләктәр тапшырылды. Ғәҙәттәгесә, тоғро тамашасылар артистарҙы алҡыштарға күмде.
Гөлдәриә Йосопова
