Санитар-эпидемиологик талаптар йомшартылыуға бәйле үҙгәрештәр ғәмәлгә инде. Уға ярашлы, балалар лагерҙарында күләмле саралар үткәрергә лә мөмкин. «Бишенсе сиреккә» әҙерлек нисек бара? БЮТ каналы хәбәрсеһе Әлфинә Килдейәрова яҙмаһында.
Таҙа, йыйыштырылған бүлмәләр балаларҙың килеүен көтә. Шишмә районындағы «Энергетик» балалар лагерында йәй дауамында меңдән ашыу бала ял итер, тип көтөлә. Шуға күрә әҙерлек күптән башланған. Биләмә сүп-сарҙан таҙартыла, корпустар тәртипкә килтерелә.
Былтыр санитар-эпидемиологик ҡағиҙәләргә ярашлы лагерҙар 75 процентҡа тупланһа, быйыл тулы ҡеүәттә эшләйәсәк. Үҙгәрештәр ковидҡа бәйле башҡа талаптарға ла ҡағыла. Мәҫәлән, яңынан саф һауала күләмле саралар үткәрергә мөмкин. Шулай уҡ, ПЦР-тест тапшырыу тик балалар лагеры хеҙмәткәрҙәренә генә ҡағыла. Тикшереүҙе улар смена башланыуға ике көн ҡалғас, бушлай үтә ала.
Ил Президенты ҡушыуы буйынса быйыл «Йөҙөүгә өйрәтеү» программаһы ла ғәмәлгә ашырыласаҡ. Программа пляж һәм бассейн менән йыһазландырылған 19 ҡала эргәһендәге лагерға ҡағыла. Был юлы ла ата-әсәләрҙең сығымдарын кәметеү маҡсатында ике – төбәк һәм федераль программаһы эшләйәсәк. Уға ярашлы, путевкаға сарыф ителгән аҡсаның 50 процентын федераль ҡаҙна, ә 30 процентын республика бюджеты ҡаплаясаҡ.
2021 йылда балалар лагерҙарының матди-техник базаһына иғтибар бүленә. 26 мәктәп янындағы һәм 24 ҡала ситендәге лагерҙар республика ҡаҙнаһынан 218 миллион һумлыҡ финанс ярҙам ала. Был сумма биналарҙа капиталь ремонт үткәреү һәм кәрәкле йыһаздарҙы һатып алыу өсөн ҡулланыла. Быйыл 9 лагерь йыл әйләнәһенә эшләү режимына күсә.
Әлфинә Килдейәрова
