Төбәк иҡтисады һәм Рәсәй тимер юлдары үҫешенә тос өлөш индерәсәк объектҡа Өфөлә үткән транспорт –логистика конференцияһына Радий Хәбиров старт бирҙе. Форумда ҡатнашыусылар онлайн режимда Стәрлетамаҡтан оҙатылған 150-се контейнер поезының тейәлеүен дә күҙәтә алды.
Көслө ел, яуым-төшөм, хатта күләгә лә ғәмәлдәге кеүек. Поездарға йөк тейәүселәр әҙерләй торған тренажер экранын ысынбарлыҡтан айырыу мөмкин түгел. Сөнки тимер юлы крансыларына талаптар ҡаты.
Олег Дергай үҙе көнөнә генә ике йөҙҙән ашыу контейнерҙы поездарға тейәп оҙата. Юғары теүәллек, ныҡлы түҙемлек һәм үткер күҙ уның иң төп ҡоралы. Ҡалғанын кран үҙе эшләй. Ғөмүмән, тимер юлы транспортында ҡул көсө мөмкин тиклем кәметелгән. Йөктөң һәр төрөн тейәү өсөн дә техника уйлап сығарылған.
Әле Куйбышев тимер юлдарында тейәлгән йөктөң 40 проценты Башҡортостан өлөшөнә тура килә. Киләсәктә уның бермә-бер артыуы көтөлә. Быға Стәрлетамаҡ йөк терминалының модернизацияланыуы булышлыҡ итәсәк.
Радий Хәбиров тимер юлдарын республика ҡаҙнаһын тулыландырыусы төп стратегик партнерҙар исемлегендә булыуын белдерҙе. Мең ярым километр тимер юлдары төбәктең иҡтисади артерияһы, тине Башҡортостан башлығы.
Быйыл тимер юлдары алдында яңы һынауҙар. Сит илдәрҙең санкция баҫымы шарттарында транспорт һәм логистиканы үҫтереү яңы эш алымдарын талап итә. Шулай ҙа предприятиелар был үҙгәрештәрҙе тиҙ арала үҙ файҙаһына борҙо. Йөк ташыу күләме кәмемәгән. Киреһенсә, эске йөк әйләнеше арта ғына. Форумда яңы реалийҙарға яраҡлашыу һәм санкцияларҙан килем алыу юлдары яңы рельстарға ҡуйылды.
Айнур Кәбиров
