Ҡырмыҫҡалы районындағы туристик базала Өфөнөң Шәһит Хоҙайбирҙин исемендәге ғаилә тәрбиәһенә булышлыҡ итеү үҙәге менән «Бергә» ғаилә үҙәге тәрбиәләнеүселәре өсөн «Ваҡыт ишеге» тип исемләнгән квест ойошторолдо. Ике үҙәктән етмешкә яҡын бала төрлө уйындарҙа ҡатнашты, күңел асты.
Кескәйҙәрҙең иң яратҡан урындарының береһе – ҡомлоҡ. Уйынды ойоштороусылар унда пазлдар йәшергән. Балаларға археологтар һымаҡ бумала менән таҙартып уларҙы табырға һәм бер һүрәт йыйырға кәрәк. Был эште улар күмәкләп етеҙ башҡарҙы.
Ҡырмыҫҡалы районындағы турбазала квест үтеүселәр баш ҡаланың «Бергә» һәм Шәһит Хоҙайбирҙин исемендәге ғаилә тәрбиәһенә булышлыҡ итеүсе үҙәктәрҙән.
«Ваҡыт ишеге» тип аталған квест программаһы өс сәғәткә иҫәпләнгән. Ул үткәнде, хәҙерге заман һәм киләсәкте үҙ эсенә ала. Ҡатнашыусылар мәсьәләләрҙе сисеп, киләсәккә барып етергә тейеш.
Аң кимәлен, етеҙлекте үҫтереүгә ҡоролған уйындарҙың саф һауала, тәбиғәт ҡосағында булыуы тағы ла файҙалы, тип билдәләй ойоштороусылар.
Ата-әсә ҡарауынан мәхрүм, йә ауыр тормош хәлендә ҡалған балалар өсөн квест эшҡыуарҙар ярҙамында үтте. Ул балалар өсөн байрамдар уҙғарыусы агентлыҡ менән берлектә ойошторолған.
Туристик базала көнө буйы шатлыҡлы ауаздар яңғырап торҙо. Аниматорҙар һәр балаға иғтибар бүлергә, йылылыҡ өләшергә тырышты. Балаларҙың күңелендә быйылғы йәйҙең тәүге көнө, моғайын, яҡты хәтирә булып оҙаҡ һаҡланыр.
