Хәҙер улар ҡушаматлы. «Уралсиб» ҡыйығын үҙ иткән ыласындарҙың ҡошсоҡтарына бөгөн орнитологтар билдә таҡты. Ҡоштар донъяһын өйрәнеүселәр менән Башҡортостан юлдаш телеканалының ижади төркөмө осрашты.
Өфө, Салауат, Спартак һәм Пионерия. «Уралсиб» банкы ҡыйығында йәшәгән ыласын ҡошсоҡтарына орнитологтар шулай тип ҡушамат бирҙе. Уларҙың икеһе ата, икеһе инә ҡош. Быйыл 19 майҙа сыҡҡан ҡошсоҡтарҙың тәпәйҙәренә белгестәр билдә лә таҡты. Билдә ярҙамында ҡошто тотмай алыҫтан фотоға төшөрөп мәғлүмәт алырға була, ти белгестәр.
Банк ҡыйығына ыласындар 2006 йылдан бирле оялай. Ойошма хеҙмәткәрҙәре уларҙы ҡарап, тәрбиәләп тора.
Йыртҡыс ҡоштарҙы тура эфирҙа күҙәтергә мөмкин. 2019 йылдан банк хеҙмәткәрҙәре видеокүҙәтеү ҡоролмаһы ярҙамында ыласындар тураһында онлайн-трансляция алып бара.
Башҡа ҡалалар менән сағыштырғанда, Өфөнө тау-таш һәм ҡаяларҙа йәшәүсе ҡоштар нығыраҡ үҙ итә, ти орнитологтар. Ҡоштар донъяһын өйрәнеүселәр әйтеүенсә, баш ҡалала ундан ашыу ыласын пары бар.
Рәмилә Исмәғилева
