Бәйгелә республиканан һәм күрше өлкәләрҙән 200-ҙән ашыу бала ҡатнашты. Конкурс 3 номинацияла, мәктәпкәсә һәм мәктәп йәшендәге балалар араһында уҙҙы. Бәйгеселәр 8 телдә әкиәт тәҡдим итте.
«Һаумы, һаумы, әкиәт» конкурсы икенсе йыл инде Башҡортостандың мәғариф һәм фән министрлығы ҡанаты аҫтында үтте. Ойоштороусылар фекеренсә, халҡыбыҙҙың меңәр йыллыҡ тәрбиә алымдарын һеңдергән әкиәтте заманса педагогикала ла киңерәк ҡулланыу мөһим.
Конкурстың төп бүләген Өфөнөң 136-сы мәктәбе уҡыусыһы Әминә Аҡбирҙина яуланы. Ул һөйләгән «Зөһрә ҡыҙ» әкиәтен баһалама ағзалары тын да алмай тыңланы.
