Ҡышҡылыҡҡа коммуналь хужалыҡ хеҙмәткәрҙәренә 1 645 ҡаҙанлыҡты, 517 йылытыу пунктын һәм 16 мең саҡрымдан ашыу һыу торбаһын әҙерләргә кәрәк. Аҙна башында үткән оператив кәңәшмәлә билдәле булыуынса, әле миҙгелгә әҙерлек 32 процент тәшкил итә.
«Өфө инженер селтәрҙәре» предприятиеһы баш ҡаланың Коммунистик, Дорофеев һәм Чернышевский урамдары киҫелешендә йылытыу селтәрҙәрен яңырта. Капиталь ремонт май аҙағында башланған. 2000-се йылдар башында һуҙылған торбаларҙы монтажлау элеккеһенә ҡарағанда ҡеүәтлерәк ҡаҙанлыҡҡа тоташырға мөмкинлек бирә. Шул уҡ ваҡытта эргәләге торлаҡ йорттар эҫе һыуҙан өҙөлмәгән. Заманса һыу үткәргес торбалар оҙаҡ йылдар хеҙмәт итәсәк, тигән фекерҙә белгестәр. Туҙғандарын алмаштырыу йылытыу миҙгелендә ғәҙәттән тыш хәлдәр килеп сығыу хәүефенән аралар тип көтөлә.
Шулай уҡ ҡаҙанлыҡтарҙа ла төҙөкләндереү эштәре йылдам бара. Мәҫәлән, «Өфө инженер селтәрҙәре» ойошмаһына ҡараған 39-сы ҡаҙанлыҡта 1976 йылда һуҙылған һыуыҡ һыу торбалары алмаштырыла. Шулай уҡ яҡын арала энергия һаҡлаусы ҡоролмаларҙы ҡуйыу планлаштырылған. Был ҡаҙанлыҡтар сәғәтенә 300 гигакалорий етештереп, 179 торлаҡ йортто, 56 социаль объектты һәм 100-ҙән ашыу ойошманы хеҙмәтләндерә.
Әлфинә Килдейәрова
