Табиптарға рәхмәт! Бөгөн Өфөлә республика медицина хеҙмәткәрҙәрен бүләкләйҙәр. Тантаналы саралар алты майҙансыҡта уҙа. Дәүләт бүләктәре һәм маҡтаулы исемдәр менән бер рәттән конкурста еңеү яулаған белгестәр ҙә тәбрикләнә. Лира Хәбирова - “Йыл табибы”. Ул республика конкурсында “Иң яҡшы ауыл табибы” номинацияһында еңеү яулаған. Лира Юлай ҡыҙы хеҙмәт юлын Өфөлә башлай. 2009 йылда тыуған яғы – Хәйбуллаға ҡайтырға ҡарар итә. Бөгөн ул Аҡъяр үҙәк район дауаханаһында эшләй.
Булат Кәбиров – “Йылдың иң яҡшы фтизиатры”. Ул Стәрлетамаҡ Туберкулездан дауалау диспансеры бүлек мөдире. “Медицина белгестәре араһында ойошторолған конкурстар үҙеңде күрһәтергә, башҡаларҙан өйрәнергә мөмкинлек бирә”, - ти ул.
Һаулыҡ һаҡлау министрлығынан хәбәр итеүҙәренсә, бөгөн Өфөлә 300-ҙән ашыу медицина хеҙмәткәре бүләкләнә.
