Башҡортостан Башлығы Радий Хәбиров Көйөргәҙе районының Яҡут ауылы биләмәһендә “ҡоро закон” тураһындағы законға ҡул ҡуйҙы. Документ 19 июлдән көсөнә инә. Ҡанун Дәүләт Йыйылышы-Ҡоролтайҙың яҙғы сессияһын йомғаҡлау ултырышында ҡабул ителгәйне. Республикала айырым биләмәлә спиртлы эсемлектәр һатыуҙы тыйыу тураһындағы тәҡдим беренсе тапҡыр законлаштырыла. Бөтә донъя башҡорттары ҡоролтайы Президиумы ағзаһы, медицина фәндәре докторы Сәлиә Мырҙабаева әйтеүенсә, һәр ауыл парламентҡа мөрәжәғәт итеп алкоголь һатыуҙы сикләү тәҡдимен еткерә ала.
Айырым биләмәлә алкоголһеҙ зона булдырыу әлегә һынау рәүешендә була.
