Спортсылар корд пилотаж моделдәре класында көс һынашты. Баш ҡалаға республиканан, Һамар һәм Силәбе өлкәләре, Санкт-Петербургтан 13 спортсы йыйылды.
Авиамодель спортының был класында кем менәндер ярышыу төшөнсәһе юҡ. Бында тәү сиратта һауа шарттары һәм үҙеңдең нервыларың менән көрәшергә кәрәк. Еңеүсе юғары пилотаж фигураларын эшләү сифаты буйынса билдәләнә. Һәр ҡатнашыусы билдәле ваҡытта бер нисә трюк башҡарырға тейеш ине.
Ярыш һөҙөмтәләре өс турҙан билдәләнде. Йомғаҡлау зачетына һәр ҡатнашыусының ике иң яҡшы һөҙөмтәһе инә. Корд пилотаж моделдәре класында ярыштар уҙғарыу өсөн иркен һәм тигеҙ асфальт майҙаны кәрәк. Бындай майҙан республикала берәү генә – Өфө районының Максимовка ауылында.
Волга буйы федераль округы беренселегендә Һамарҙан Даниэль Ғәрфетдинов еңеп сыҡты. Уның ағаһы Марсель өсөнсө урында. Ғөмүмән, Һамар өлкәһендә авиамодель спорты популяр һанала.
Волга буйы федераль округы чемпионатында Трехгорныйҙан Сергей Герасимов, Тольяттинан Владимир Страхов һәм уның яҡташы Максим Копсов еңеп сыҡты. Быйыл Әбйәлил районы Асҡар ауылында ирекле осоусы моделдәр класында Волга буйы федераль округы чемпионаты үтә. Ә Максимовкала үткән ярышта ҡатнашыусылар Пенза өлкәһенә үткән Рәсәй чемпионатына юллана.
Гөлдәриә Йосопова
