Башҡортостан менән Абхазия араһында тауар әйләнешен арттырыу планлаштырыла. Былтыр был күрһәткес 14 миллион долларҙан ашыу булған. Хәҙер уны 10 тапҡырға күтәреү ҡарала. Республика Премьер-министры Андрей Назаров телеграм-каналында яҙыуынса, Башҡортостан аҙыҡ-түлек тауарҙары – иген, ҡоро һөт, көнбағыш майы, инкубатор йомортҡаһы һәм башҡа продукция оҙатыу күләмен арттырыға ниәтләй. Абхазиянан иһә күпләп йәшелсә-емеш, шарап, башҡа төр тауар алынасаҡ. Ике арала туризмды үҫтереү планы ла бар. Агросәнәғәт, төҙөлөш, коммуналь хужалыҡ комплекстарында, сауҙа, медицина, мәғариф һәм мәҙәни өлкәләрҙә берлектәге проекттарҙы үҫтереү күҙаллана.
