Башҡортостан башлығы ҡушыуы буйынса Луганск халыҡ республикаһының Петровское ҡалаһына сираттағы гуманитар ылау оҙатылды. Белем усағында яҡташтарыбыҙ көсө менән күләмле төҙөкләндереү эштәре алып барыла. Реконструкцияны яңы уҡыу йылына тамамлау ҡаралған. БЮТ хәбәрсеһе Гөлназ Хәйбуллина дауам итә.
Йөк машиналарында – төҙөлөш материалдары. Сираттағы гуманитар ылау Луганск халыҡ республикаһына тәғәйенләнгән. Тәжрибәле водителдәр оло юлға сығыр алдынан фураларҙың техник төҙөклөгөн тикшереп, инструктаж үтә. Петровское ҡалаһының белем усағында барған капиталь ремонтҡа Башҡортостанда йәшәүселәрҙең ярҙамын еткереү – яуаплы бурыс.
112-се Башҡорт кавалерия дивизияһының легендар командиры, генерал-майор Миңлеғәле Шайморатов исемен йөрөткән белем усағында капиталь ремонт Башҡортостан төҙөүселәре көсө менән алып барыла. Яҡташтарыбыҙ хеҙмәт вахтаһын лайыҡлы үтә. Мәктәптың ҡыйығы, тышҡы яғы, тәҙрәләре, инженер селтәрҙәре яңыртыла.
Коллоннаны юл хәрәкәте хәүефһеҙлеге дәүләт инспекцияһы патруле һәм ғәҙәттән тыш хәлдәр буйынса дәүләт комитеты хеҙмәткәрҙәре оҙатып бара. Барлығы 21 кеше һәм ун берәмек техника юлға сыҡты.
Петровское ҡалаһындағы мәктәп төҙөлөш материалдары менән даими тәьмин ителә. Эш күләме ҙур. Белем усағында ремонт нигеҙ һалынған көндән, уҙған быуаттың утыҙынсы йылдарынан алып башҡарылмаған. 2014 йылда бинаның ут аҫтында ҡалыуы техник торошон йәнә ҡатмарлаштыра.
Мәктәптең капиталь ремонтын Яңы уҡыу йылына тиклем тамамлау планлаштырылған. Башҡортостандан төҙөлөш бригадаһы ялға туҡтамай эшләй. "Белем усағы фойеһында яҡташыбыҙ, Рәсәй Геройы Миңлеғәле Шайморатовҡа ҡуйылған бюст фиҙакәр хеҙмәт алып барыуға көс өҫтәй", – ти оҫталар.
Гөлназ Хәйбуллина
