Өфө мәшғүллек үҙәге Калинин районы буйынса филиалында социаль контракт нигеҙендә эш эҙләүселәргә 4 ай дауамында матди ярҙам да күрһәтелә. «Эш эҙләү» сараһының аҙ тәьмин ителгән граждандарға әһәмиәте хаҡында тулыраҡ киләһе яҙмала.
Нина Лопатина Өфөнөң Калинин районында урынлашҡан Мирауай суд участкаларының береһендә эшләгән. Ике баланы яңғыҙы тәрбиәләүсе әсәнең эш хаҡы минималь эш хаҡынан күпкә түбән булған.
Аҡса етмәүе Нина Валерьевнаны эшенән ғариза яҙып китергә мәжбүр итә. Ҡатын үҙе йәшәгән районда урынлашҡан мәшғүллек үҙәгенә мөрәжәғәт итә. «Эш эҙләү» системаһы ярҙамында йәш әсә ике айҙан һуң эшле була.
Нина Валерьевна тиҙ генә коллективҡа инеп киткән. Ҡыҫҡа ғына ваҡыт эсендә үҙен эшһөйәр, пунктуаль хеҙмәткәр итеп күрһәткән.
Лира Лобастова өс йыл никах теркәү йортонда архивта эшләгән. Килешеү мөҙҙәте тамамланғандан һуң эшһеҙ ҡалған. Ике йыл дауамында эш эҙләгәндән һуң мәшғүллек үҙәге ярҙамы менән социаль контракт төҙөгән. Уға ике ай эсендә эш тәҡдим иткәндәр. Июль башынан ул Өфөнөң 4-се балалар поликлиникаһында администратор вазифаһында.
Адреслы социаль ярҙам аҙ тәьмин ителгән граждандарға республика ҡаҙнаһынан мәшғүллек үҙәктәре аша граждан менән килешеү нигеҙендә түләнә.
Мәшғүллек үҙәктәренең «Эш эҙләү» системаһы күптән үҙен аҡлаған. Был хеҙмәт ярҙамында аҙ тәьмин ителгән граждандар бер-нисә ай эсендә лайыҡлы эш хаҡы булған ойошмаларға эшкә урынлаша һәм 4 ай дауамында адреслы социаль ярҙам алыу мөмкинлегенә эйә була.
Гүзәл Борханова
