Аҡһым концентратын алыу өсөн махсус реактив ҡушыла. Бер нисә аҙнанан һуң, киптерелгән аҡһымды ҡош-ҡортҡа аҙыҡ итеп ҡулланырға мөмкин. Биологтар әйтеүенсә, бындай ашлама туҡлыҡлы һәм файҙалы.
Аҡһым концентратын сығарыу өсөн тауыҡ тиҙәгенә һыу һәм махсус реактив ҡушыла. Әҙер продукт алыу өсөн бер нисә аҙна талап ителә. Башҡорт дәүләт университетының өсөнсө курс студенты Алексей Червов тауыҡ тиҙәген ҡабаттан ҡулланыу технолгияһын уйлап табыр алдынан төрлө ысулдар ҡулланып ҡарай. Ниһайәт, өс ай элек иң һөҙөмтәлеһенә юлыға. Туҡлыҡлы аҙыҡ ҡошсолоҡ фабрикаларына өҫтәмә килем килтерә аласаҡ, тигән фекерҙә ул.
Белгестәр һүҙҙәренсә, тауыҡ тиҙәге хәүефлек кимәле буйынса 3-сө класҡа ҡарай. Тимәк, уны үҫемлектәрҙе туҡландырыу һәм тупраҡтың уңдырышлылығын күтәреү өсөн ҡулланырға ярамай. Шуға күрә тауыҡ тиҙәген ҡайтанан эшкәртеү экологик һәм иҡтисади яҡтан да отошло тип һанала.
Проект Башҡорт дәүләт университетында инвестиция партнерҙары менән хеҙмәттәшлек итеү сиктәрендә ғәмәлгә ашырыла. Атап әйткәндә, «Өҫтөнлөк – 2030» программаһы студент һәм аспиранттарҙы иҡтисадтың реаль секторындағы эшкә әҙерләй.
Ғалимдар билдәләүенсә, методика уңышлы һынау үткән осраҡта, ҡошсолоҡ фабрикаларын ҡалдыҡтарҙы эшкәртеү процесына йәлеп итеү өсөн өс йыл тирәһе ваҡыт талап ителәсәк.
Әлфинә Килдейәрова
