Өфө дәүләт нефть техник университеты стартап-студиялар булдырыласаҡ Рәсәйҙең 20 юғары уҡыу йорто исемлегенә ингән.
Ярҙам күләме 300 миллион һум тәшкил иткән. Башҡортостандағы үҙәктә ете йүнәлеш эшләйәсәк: нефть һәм газ, медицина, мәғариф, аграр проекттар, декарбонизация, мәғлүмәт, яңы тормош мөхите технологиялары.
2024 йылға тиклем вуздың стартап-студияһы аша 250 студент үтәсәк. Радий Хәбиров социаль селтәрҙәге сәхифәһендә университет коллективын сираттағы еңеү менән ҡотлап, уңыштар теләне.
«Донъя кимәлендәге Евразия ғилми-мәғариф үҙәге, ысынлап та, республикала фән һәм юғары мәктәпте координациялау һәм үҫтереү ҡоралына әйләнеп бара. Вуздарҙың көсөн берләштереп, һөҙөмтәле заявкалар әҙерләп, уларҙы федераль кимәлдә уңышлы күрһәтеү - юғары күрһәткестәргә ирешеү мөмкинлеге бирә», - тип яҙған төбәк етәксеһе.
Гөлназ Хәйбуллина
