Төбәк бүлексәһен Туймазы ҡалаһының «Корона» фабрикаһы директоры урынбаҫары Алмаз Мамлеев етәкләйәсәк.
Илдең йәш сәнәғәтселәр клубы әлеге көндә 30-ҙан ашыу төбәк вәкилдәрен берләштерә. Ул 40 йәшкә тиклемге эшҡыуарҙарҙы бергә туплау маҡсатында ойошторолған. Клуб алдынғы технологияларҙы үҙләштереүгә, үҙ-ара хеҙмәттәшлек итергә, заказдарҙы формалаштырыу өҫтөндә эшләргә булышлыҡ итә.
Ойошма етәксеһе – Рәсәй Хөкүмәте Премьер-министры урынбаҫары, сәнәғәт һәм сауҙа министры Денис Мантуров. Ул төбәк предприятиеларын федераль кимәлгә сығарыу буйынса даими ярҙам күрһәтә. Башҡортостан вәкиллегенең етәксеһе итеп Алмаз Мамлееевты һайлау ҙа осраҡлы түгел, ул илдең «Иң яҡшы 100 төбәк предприятиеһы етәксеһе» конкурсында еңеү яулаған тәжрибәле эшҡыуар.
Сәнәғәтселәр фекеренсә, республикала был тармаҡҡа ныҡлы иғтибар бирелә. Башҡортостандың һөҙөмтәле сәнәғәт сәйәсәте рейтингында икенсе йыл рәттән алдынғы урын биләүе лә ошо даими эшмәкәрлек менән бәйле.
Рәмзиә Кәримова
