Фрунзе, Комсомол, Герцен урамдары киҫелешендәге алты күп ҡатлы йорттар араһын комплекслы төҙөкләндереүҙән һуң асыу байрамында БЮТ ижади төркөмө лә булды.
Ихатаның яңыртылыуын иң ныҡ көткәне, әлбиттә, балалар. Быйыл май айынан бирле барған эштәр теүәлләнгән. Кескәйҙәргә рәхәтләнеп уйнай торған майҙансыҡ танырлыҡ та түгел. Хәҙер улар улар заманса бәүелсәктәрҙә, каруселдәрҙә өйөрөлә.
«Башҡортостан ихаталары» программаһы буйынса бүленгән 45 миллион һумға ихатала күп ҡатлы йорттарҙа йәшәүселәр өсөн бөтә уңайлыҡтар булдырылған. Спорт майҙансыҡтары еренә еткереп эшләнгән. Үҫмерҙәргә баскетбол, волейбол, футбол һәм хоккей уйнарға урын бар.
Ҡыйыҡ менән ябылған тренажер майҙансығын иһә өлкәндәр үҙ иткән. Хаҡлы ялдағыларға пенсия аҡсаһына фитнес залға йөрөү мөмкин түгел, ә бындағы спорт ҡоролмалары ундай залдағыларҙан ҡалышмай.
Иң кескәйҙәр өсөн айырым майҙансыҡ эшләнгән. Велосипед формаһындағы әйләнгестәргә сабыйҙар беренсегә ултара, бындай таусыҡтар ҙа әле Октябрскиҙа тәүгеһе.
Майҙанда ҡартайған тирәк ағастары ҡырҡылған,яңы үҫентеләр ултыртылған. Ҡала хакимиәтенән белдереүҙәренсә, ихаталарҙы яңыртыуға сират бар. «Башҡортостан ихаталары» программаһы ярҙамында уларҙы ремонтлау дауам итәсәк.
Рәмилә Исмәғилева
