Был кампания мобилизация ваҡытына ғына бер айға кисектерелеп торҙо, әммә башҡа үҙгәрештәр көтөлмәй.
Барыһы ла үткән йылдарҙағыса ғәҙәти режимда ойошторола, тине Башҡортостандың хәрби комиссары Михаил Блажевич журналистар менән осрашыуҙа. Көҙгө саҡырылыш тураһында ентекләберәк Айнур Кәбиров репортажында.
Роман медицина комиссияһы алдында тәүгә түгел. Былтыр гипертония сире асыҡланғас хәрби хеҙмәткә алыныу кисектерелеп торған. Быйыл табиптар уның сәләмәтлеген ентекле тикшерәсәк. Әгәр ҡәтғи сәбәптәр асыҡланһа, армияға ул бөтөнләй алынмаясаҡ.
Былтыр көҙ армияға алыныусы егеттәр ҡайта башлаған, әммә уларға алмаш әле саҡ туплана ғына. Хәрби хеҙмәткә саҡырылыш быйыл бер айға һуңлап башланды. Шулай ҙа мобилизация индергән төҙәтмәләр ошоноң менән тамам. Ҡалған эш ғәҙәттәгесә ойошторолған. Сәләмәтлеккә ҡарап тормай, барыһын да һалдатҡа алалар тигән имеш-мимештәргә нигеҙ юҡ.
Йәмғеһе көҙгө саҡырылышта 4 мең тирәһе егетте хәрби хеҙмәткә алыу күҙаллана. Улар илебеҙҙең төрлө хәрби частәренә оҙатыласаҡ. Башлыса улар ҡоро ер ғәскәрҙәрендә хеҙмәт итәсәк. Һәм иң мөһиме: кисектергеһеҙ хәрби хеҙмәткә алыныусылар бер ниндәй ҙә бәрелештәргә оҙатылмай, тине Михаил Блажевич.
Махсус хәрби операцияны иҫәпкә алып күптәрҙе әрмегә алыныусыларға кейем-һалым, экипировка етерме, тигән һорау ҙа борсой. Халыҡтың хафаланыуы осраҡлы түгел, сөнки өлөшләтә мобилизацияға йәлеп ителеүселәргә ярҙам йыйырға тура килде. Илдең оборона министрлығынан белдереүҙәренсә, һалдаттар хәрби һәм спорт кейемдәре менән тулыһынса тәьмин ителәсәк.
Айнур Кәбиров
